અમદાવાદ: દેશના સૌથી વ્યસ્ત એવા સરદાર વલ્લભભાઈ પટેલ આંતરરાષ્ટ્રીય એરપોર્ટ પરથી એક એવી વસ્તુ મળી આવી છે જેને લઈને આખી એરપોર્ટ ઓથોરિટી દોડતી થઈ હતી. ગ્રાઉન્ડ સ્ટાફ જ્યારે ટોયલેટની સફાઈ કરતા હતા ત્યારે તેની ડસ્ટબીનમાંથી અજીબ વસ્તુ જોવા મળી હતી. જ્યારે આ વસ્તુ ખોલવામાં આવી તો તેને સૌ કોઈ ચોંકી ગયા હતા. જોકે આ જ મળેલી અજીબ વસ્તુના કારણે જ સફાઈ કર્મચારીનું સન્માન પણ કરવામાં આવ્યું હતું.
નવાઈ લાગે એવી વાત છે પણ તદ્દન સાચી છે. ત્યારે આવો જાણીએ શું છે સમગ્ર મામલો.
બનાવની વિગતો જોઈએ તો, ગઈકાલે એરપોર્ટ પર હાઉસકીપિંગ સ્ટાફના કર્મચારી દિનેશ ગરવા સવારે સફાઈ કરી રહ્યા હતા. જે દરમિયાન દિનેશ ગરવાને ટોયલેટના ડસ્ટબીનમાં કંઈક અજુગતું હોવાનું લાગ્યું હતું. જેને લઈને તપાસ કરતા અંદર વજનદાર વસ્તુ હોવાનું લાગ્યું હતું. જ્યારે એ વસ્તુ ખોલવામાં આવી તો અંદર બે સીલબંધ પેકેટ હતા. તેમણે આ બાબતે તરત જ એરપોર્ટ ઓથોરિટી અને કસ્ટમ્સ અધિકારીઓને જાણ કરી હતી.
અધિકારીઓએ તપાસ કરતા બંને પેકેટમાંથી 750 ગ્રામ સોનાની પેસ્ટ મળી આવી હતી. દાણચોરીની આ રીત જોઈને લોકોને નવાઈ લાગી હતી. જણાવી દઈએ કે, કસ્ટમ્સની ટીમે સોનું જપ્ત કરીને આ પ્રકરણની તપાસ શરૂ કરી છે. મહત્વનું છે કે આ મામલે તમામ અધિકારીઓએ સફાઈ કર્મચારી દિનેશ ગરવાની વફાદારી અને કાર્યનિષ્ઠાની સરાહના કરી હતી. તેમજ આવી વફાદારી માટે તેમને અભિનંદન આપવામાં આવ્યા હતા.
નોંધનીય છે કે, દેશભરમાં ઘણા સમયથી દાણચોરીનું પ્રમાણ વધી રહ્યું છે. ખાસ કરીને અમદાવાદ એરપોર્ટ તો જાણે હોટ ફેવરિટ સ્થળ બન્યું હોય એવું લાગી રહ્યું છે. રોજબરોજ કંઈક પકડાયા હોવાનું સામે આવતું હોય છે. સ્થાનિક અધિકારીઓ ભલે અમદાવાદ એરપોર્ટ પરથી સોનાની દાણચોરી લગભગ અટકાવવામાં આવી હોવાની વાતો કરતા હોય પરંતુ ત્યારે સોનાની પેસ્ટ મળતાં હજુ દાણચોરી ચાલુ હોવાનું સાબિત થઈ ગયું છે.